Óhætt er að segja að Ingu Sæland hafi verið heitt í hamsi á Alþingi rétt í þessu en þar gagnrýndi hún harðlega að til stæði að samþykkja nýtt frumvarp sem leyfir fóstureyðingar út 22. viku.

„Við konur höfum beðið nógu lengi eftir réttlæti, réttlætinu að fá að ráða því hvort 22 vikna gamalt barn, ófullburða í móðurkviði, verður lífs eða liðið. Er það eitthvað til að státa af?,“ spurði Inga.

Hún hélt svo áfram og sagði: „Ég vil tala af alúð og natni. Hér er jafnvel gengið svo langt að háttvirtir þingmenn hrópa húrra fyrir því að þetta skuli ná fram að ganga. Ég ætla að taka undir með þeim sem hér hafa sagt áður, það mun engu máli skipta hversu lengi við velkjumst um með þetta í kerfinu, það er markmiðið að þetta verði gert og það hefur þessi salur sannarlega sýnt með frábærum húrra-hrópum og gleðihljóðum þegar við ætlum hér að taka ákvörðun um það að 22 vikna gamalt barn verði drepið í móðurkviði! Ég mun alltaf segja nei,“ sagði Inga.