Harmleikur átti sér stað í miðbæ Reykjavíkur aðfaranótt laugardags. Karlmaður fannst látinn eftir að hafa fallið fram af þaki á byggingu í Lækjargötu. Samkvæmt heimildum DV voru engin vitni að fallinu.
Lögreglan á höfuðborgarsvæðinu fer með rannsókn málsins. Ekki er vitað um tildrög andlátsins. Jóhann Karl Þórisson hjá lögreglunni á höfuðborgarsvæðinu segir að maðurinn hafi verið erlendur ferðamaður:
„Hann hefur greinilega fallið af þakinu og fólk heyrði dynkinn. Málið er nú til rannsóknar,“ segir Jóhann og bætir við að ekki sé hægt að gefa frekari upplýsingar um harmleikinn að svo stöddu, á meðan rannsókn stendur yfir.
