Strætisvagnabílstjórinn Skúli Alexandersson hefur vakið mikla athygli undanfarið fyrir skrautlegt útlit sitt undir stýri og mynd af honum hefur meðal annars birst á Reddit. Það fer ekki fram hjá neinum að Skúli er dyggur stuðningsmaður íslenska knattspyrnulandsliðsins.

Skúli keyrir um á vagni skreyttum íslenska fánanum. Sjálfur er hann klæddur í íslenska treyju og buxur með Íslandsbótum, Íslandsfánabuff ber hann á höfði og er málaður í framan. Treflar, svitabönd, armbönd allt merkt eldgamla Ísafold.

Þessi múndering Skúla hefur vakið mikla kátínu hjá farþegum Strætó, bæði útlendingum og Íslendingum og hefur hann varla undan við að láta mynda sig.