Margrét Friðriksdóttir, frumkvöðlafræðingur, var synjað um endurhæfingarlífeyri eftir að hún hryggbrotnaði í ágúst síðastliðnum. Kostnaðurinn, sem hleypur á hundruðum þúsunda, fellur því allur á hana sjálfa.

„Ég fæ enga aðstoð frá Tryggingastofnun sem ég á rétt á samkvæmt lögum. Ég hefði aldrei trúað hversu kerfið er rotið og þjónar ekki tilgangi sínum lengur virðist vera“ segir Margrét í samtali við DV.

Hryggbrotnaði í útreiðartúr

Margrét var í útreiðartúr með vinum sínum laugardaginn 12. ágúst árið 2017 á Þingvöllum þegar hestur hennar fældist og tók skyndilega á rás. Losnaði hún úr ístaðinu og taldi það illskásta möguleikann að stökkva af baki. Þá lenti hún á afturendanum, fékk mikinn hnykk og hryggbrotnaði á sama stað og hún hafði brotnað tuttugu árum áður í bílslysi.

Skömmu eftir að þetta gerðist sendi hún inn umsókn til Tryggingastofnunar um endurhæfingarlífeyri en fékk ekki svar fyrr en hálfu ári síðar.

„Þeir segja að ég uppfylli ekki skilyrðin en það vill enginn gangast við synjuninni. Ég fékk nafnlaust bréf og ég hringdi til þeirra og bað um nafn en fékk ekki.“

Með vottorð frá lækni og sjúkraþjálfara

Brot Margrétar var þvert yfir lendarhrygginn. Hún þarf að fara í sjúkraþjálfun einu sinni í viku, á erfitt með að sitja, getur ekki beygt sig mikið eða lyft þungu. Best sé fyrir hana að ganga mikið og hvílast vel inn á milli. Læknirinn hennar og sjúkraþjálfari sendu báðir vottorð og endurhæfingaráætlun til stofnunarinnar en allt kom fyrir ekki.

„Læknarnir segja mig heppna að hafa ekki lamast. Hryggbrot tekur lágmark þrjú ár að gróa þannig að þessi afstaða Tryggingastofnunar er óskiljanleg. Þeir gáfu engar frekari útskýringar en sögðu mig geta kært niðurstöðuna sem tekur nokkrar vikur til viðbótar.“

Kostnaður Margrétar er mjög mikill. Hún segir beinan kostnað á fimmta hundrað þúsund krónur á næstu þremur árum og gæti hækkað meira. Þá hafi hún einnig orðið fyrir vinnutapi og hafi engar tekjur á móti. Tryggingarnar borga ekki fullar bætur þar sem þetta var frítímaslys, 47 þúsund krónur fyrir lækniskostnaði, lyfjum og endurhæfingu. Kostnaðurinn er fyrir löngu komin vel yfir þá upphæð.