Lilja Rafney Magnúsdóttir, þingmaður Vinstri grænna, segist ekki hafa óskað eftir því að öldruð kona yrði ákærð af lögreglustjóranum á Vestfjörðum. RÚV greind frá því í gær að kona á níræðisaldri hafi verið ákærð fyrir líkamstjón af gáleysi og brot á umferðarlögum þegar hún varð völd að árekstri í Vestfjarðargöngum sumarið 2017.

Lilja segir að hún og fjölskylda hennar hafi lent í umræddu slysi. „Vegna þessarar fréttar sem kom á Rúv í gær vil ég og fjölskylda mín sem lenti í þessu slysi koma því á framfæri að það er ekki að okkar vilja að lögreglan leggur fram kæru og höfum við ekkert með þá ákvörðun að gera og óskum Reynu alls hins besta og þökkum Guði fyrir að ekki fór enn verr í þessu slysi sem sér ekki fyrir endan á. Með góðri kveðju Lilja Rafney og Hilmar,“ skrifar Lilja á Facebook. Hún vísar svo í frétt RÚV en þar segir að konan hafi ekki veitt nægilegrar aðgæslu  við akstur í göngunum.