Evrópusamtök fatlaðs fólks, European Disability Forum, segja að þingmennirnir sem sátu á alræmdu sumbli á barnum Klaustur séu sekir um hatursorðræðu gagnvart fötluðum. Samtökin segja að þingmennirnir allir sex ættu að sjá sóma sinn í því að segja af sér.

Þetta kemur fram í yfirlýsingu sem birtist á vef samtakanna en vísað er jafnframt í frétt BBC um málið. Fyrirsögn tilkynningarinar er „Óafsakanleg hatursorðræða frá íslenskum þingmönnum“.

„Okkur var verulega brugðið að frétta af svívirðingum íslenskra þingmanna gagnvart kvenkyns samstarfsmönnum og gagnvart Freyju Haraldsdóttur, fötlunaraktivista og fyrrverandi þingmanns. Umræddir þingmenn ættu að átta sig á því að hegðun þeirra er óásættanleg og þeir ættu að segja strax af sér. Hatursorðræða sem þessi er óverjandi. Afsökunarbeiðnir sagðar í hálfkæringi eru óafsakanlegar. Stjórnmálamenn eiga að vera fyrirmyndir. Þessir þingmenn eru andstæðan við það,“ segir í yfirlýsingu sem má lesa í heild sinni hér.