JydskeVestkysten skýrir frá þessu. Haft er eftir Morten Hans Jakobsen, einum skiptastjóranna, að bíllinn hafi verið seldur fyrir 150.000 danskar krónur og sú upphæð og 250.000 krónurnar séu einu eignir þrotabúsins. Hann undrast að stjórnendur félagsins hafi sagt að fyrirtækið ætti 5,1 milljónir í banka og eignir að verðmæti 1,5 milljóna króna. Skiptastjórarnir eru því nú að rannsaka fjármálagjörninga fyrirtækisins til að kanna hvort einhverjir hafi fengið greitt á undan öðrum.
Jakobsen dregur enga dul á að málið líti ekki vel út fyrir lánadrottna og að hætt sé við að þeir fái lítið sem ekkert greitt úr þrotabúinu. Skiptaráðendurnir eru nú að leita að einstaklingum eða fyrirtækjum sem hugsanlega skulda Primera Air peninga til að reyna að finna meiri peninga í þrotabúið en hefur lítið orðið ágengt í þeim efnum.
Peder Hornshøj, forstjóri Bravo Tours ferðaskrifstofunnar og stjórnarmaður í Primera Air, sagðist ekki átta sig á hvernig getur staðið á því að stjórnendur félagsins hafi sagt 5,1 milljón vera til en svo væru aðeins 250.000 krónur í bankanum. Hann sagðist ekki hafa haft yfirsýn yfir fjármál félagsins þrátt fyrir að vera stjórnarmaður. Hann sagðist ekki vera í neinu sambandi við Hrafn Þorgeirsson fyrrum forstjóra Primera Air og vildi ekki láta blaðamanni JydskeVestkysten símanúmer Andra Más Ingólfssonar, eiganda Primera Air, í té.