Að verða faðir er stór stund og sömuleiðis að verða afi. Fáir verða langafar og nánast óheyrt er að einhver verði langalangafi. Það varð hins vegar klæðskerinn og stórstúkumaðurinn Ottó Guðjónsson, sem bjó að Norðurbrún í Reykjavík, haustið 1983 en hann var þá 85 ára að aldri.

Ottó hélt á sínu fyrsta barnabarnabarnabarni undir skírn í Dómkirkjunni, dreng sem fékk nafnið Ottó í höfuðið á afa sínum. Móðir Ottós yngri var Þorbjörg Rafnsdóttir 22 ára, amma Guðrún Stewart 41 árs og langamma Þorbjörg Ottósdóttir 59 ára. Við tilefnið var tekin mynd af þessum fimm ættliðum frá Ottó til Ottós.