Ronja Auðunsdóttir fann kött í hræðilegu ásigkomulagi nú fyrir stuttu. Samkvæmt færslunni sem hún birti á Facbook hópnum Kattarvaktin var kötturinn augljóslega pyntaður. Í samtali við DV segir Ronja: „Hér var algjört illmenni að verki“

Ronja og sonur hennar voru í hjólreiðatúr í Hellisgerði þegar sonur hennar fann köttinn nær dauða en lífi. Þegar sonur hennar fann köttinn kallaði hann á mömmu sína: „Mamma, það er sofandi köttur hérna“.

Ronja kom þá að kettinum þar sem búið var að hengja hann og augljóslega pynta hann.

„Það var búið að festa hann með netaböndum og binda hann við tréð, það var búið að hengja hann. Ég er í áfalli, þetta var bara að gerast. Það er greinilegt að hér var algjört illmenni að verki. Það var greinilega verið pynta hana. Hún er greinilega búin að liggja þarna í langan tíma, það var komin lykt og drep í sárin. Ég var heillengi að því að reyna ná böndunum af kettinum. Að hugsa sér að einhver gæti gert svona hluti.“

Eftir að Ronja hafði skorið köttinn lausan hringdi hún á lögregluna til að óska eftir aðstoð.

„Ég hringdi á lögregluna en þeir sögðu að það væri enginn bíll laus þar sem eingöngu einn bíll væri á svæðinu svo ég setti inn færslu á kattarvaktina á Facebook og kallaði eftir hjálp.“ Það leið ekki að löngu þar til hjálparkalli Ronju var svarað og kom Ingibjörg Hjaltadóttir, sem er hjúkrunarfræðingur, fljótt á staðinn til að sækja köttinn og koma honum upp á dýraspítala.“

Í samtali við DV sagði Ingibjörg að kötturinn væri nú kominn undir læknishendur á dýraspítalanum í Garðabæ og var strax gefið honum næringu í æð ásamt því að gefa honum sýklalyf. Samkvæmt Ingibjörgu er kötturinn örmerktur og mun dýraspítalinn leita að eigandanum á morgun.

Eins og sést á myndunum hér að neðan stórsést á kettinum.