Lögregla telur að óvenjulegan líkfund á kvennaklósetti verslunarmiðstöðvar í Calgary í Kanada megi rekja til slyss. Það var í vikunni að lík ungs karlmanns fannst bak við vegg inni á kvennaklósettinu.
Lögregla hófst strax handa við rannsókn málsins og telur hún víst að maðurinn hafi sjálfur komið sér sjálfur á bak við vegginn. Þar hafi hann setið fastur og líkur séu á að hann hafi látist af völdum súrefnisskorts.
Maðurinn sem um ræðir var á þrítugsaldri. Þó að lögregla telji að um slys hafi verið að ræða er nokkrum spurningum enn ósvarað. Til dæmis liggur ekki fyrir hvers vegna maðurinn ákvað að fara á bak við vegginn. Til að komast á bak við hann þarf að fjarlægja lítið lok af loftræstiopi ofan á veggnum sem er í nokkurra metra hæð.
Eftirlitsmyndavélar gefa til kynna að maðurinn hafi farið einn inn á salernið síðdegis síðastliðinn föstudag. Það var svo á mánudag að starfsfólk sem sinnir ræstingum í verslunarmiðstöðinni fann líkið.