Tónlistarmaðurinn Bubbi Morthens segist fara „algjörlega á tánum“ inn á svið í hvert sinn sem hann heldur tónleika, að hann sé þá ekki andlega staddur í raunveruleikanum vegna kvíða. Þetta kemur fram í viðtalsbroti við Menninguna á RÚV, en þátturinn verður sýndur í heild sinni í kvöld.

Bubbi verður að eigin sögn erfiður við fólkið í sínu nánasta umhverfi þegar líður að tónleikahaldi, allt að tíu dögum fyrr.

„Ég fer að væla, tala um að ég sé slappur og ekki í góðu formi. Ég hélt alltaf að fólk væri að bulla en staðreyndin er að þetta er satt. Þess vegna fór ég að ræða þetta við sálfræðinginn minn,” segir Bubbi og tekur fram að rótin að kvíðanum að mati sálfræðingsins tengist æsku hans.

„Við fórum yfir þetta og skoðuðum þetta. Þannig að ég held að ég sé að nálgast tónleika öðruvísi en venjulega. Áður fyrr setti ég bara í mig efni, fór í gegnum alls konar hluti með því að deyfa sjálfan mig. Nú fer ég inn á svið fullur eftirvæntingar.“

Tónlistarmaðurinn tekur fram að hann væri annars vegar á vondum stað ef hann fengi ekki þessa tilfinningu og telur hana geta verið jákvæða og hvetjandi.

Bubbi heldur tónleika í Eldborgarsal Hörpu í kvöld en þar flytur hann lög af plötunum Kona og Sögur.