Sagður hafa boðið barninu eiturlyf gegn kynlífsgreiðum
Brotið var með grófum hætti á 16 ára stúlku í tvígang um þar síðustu helgi á sjúkrahúsinu Vogi samkvæmt heimildum DV. Stúlkan hafði leitað skjóls hjá Vogi til að takast á við áfengis- og eiturlyfjafíkn en fullorðinn karlmaður sem einnig var sjúklingur liggur undir grun um að hafa beitt stúlkuna ofbeldi tvo daga í röð.
Samkvæmt heimildum DV er málið nú á borði lögreglu og hefur stúlkan farið í skýrslutöku. Þá hefur Barnavernd einnig verið upplýst um frásögn stúlkunnar. Upp komst um málið í byrjun síðustu viku og var þá hinum fullorðna einstaklingi vísað strax úr meðferðinni. Hefur verið tekið af hörku á málinu á sjúkrahúsinu en á upptökum úr öryggismyndavélum má sjá að maðurinn var í samskiptum við stúlkuna og fór með hana afsíðis. Þá hefur DV staðfest frá Vogi að meint brot hafi átt sér stað.
Heimildir DV herma að hinn fullorðni karlmaður hafi boðið barninu eiturlyf gegn kynlífsgreiðum og nýtt sér afls og aldursmun til að brjóta á barninu.
Á Vogi er meðferð fyrir unglinga og fullorðna. Unglingarnir eru á deild sem oft er nefnd bangsadeildin og eru svefnálmur aðskildar. Það kemur hins vegar ekki í veg fyrir að hinir fullorðnu hafa greiðan aðgang að unglingunum. Hinir fullorðnu fíklar og unglingarnir nota sama reykingarsvæði, borða í matsalnum og þá sitja þau sömu fyrirlestra.
Stúlkan hefur átt mjög erfitt undanfarin ár en er staðráðin í að ná tökum á lífi sínu og ætlar að halda áfram í meðferðinni sem SÁÁ býður uppá þrátt fyrir að brotið hafi verið á henni á þeim stað sem hún fór á til að sækja hjálp. Hún hefur verið flutt á annan stað til þess að halda meðferðinni áfram.
Það hefur lengi verið umdeilt að börn og unglingar undir 18 ára aldri séu vistaðir á Vogi. Rótin, félag um málefni kvenna með áfengis- og fíknivanda, hafa gagnrýnt SÁÁ vegna þessa. Þá vakti athygli þegar þrjár ungar konur stigu fram og tóku undir þessa gagnrýni og sögðu ekki hægt að koma í veg fyrir samneyti barna og fullorðinna á Vogi.
Glódís Tara Fannarsdóttir, Súsanna Sif Jónsdóttir og Þóra Björg Sigríðardóttir eiga allar langa neyslusögu að baki. Allar hafa þær dvalið á Vogi á einhverjum tímapunkti og eru sammála um að það bjóði hættunni heim að blanda saman sjúklingum af mismunandi aldri og af báðum kynjum inn á meðferðarstofnuninni:
„Það er rosalega mikið um það að eldri menn sæki í ungar stúlkur, eða þá að þessar ungu stúlkur sem eru að koma þarna inn úr neyslu séu að leita að hlýju hjá þessum mönnum” sagði Glódís Tara Fannarsdóttir í viðtali á Stöð 2 fyrir þremur árum. Þóra Björg Sigríðardóttir tók í sama streng og sagði: „Þegar við komum þarna inn, brotnar úr neyslu, þá viljum við oft ekki horfa inn á við; á vandann hjá okkur sjálfum. Þá flýjum við vandann þegar einhver sýnir okkur athygli og þá fer öll einbeitingin yfir á hinn aðilann.“ Kristín Pálsdóttir stjórnakona í Rótinni sagði í sama þætti:
„Ef við skoðum þetta annars staðar í heilbrigðiskerfinu þá náttúrulega tíðkast þetta ekki. Landspítalinn er náttúrulega með mjög ákveðna skiptingu; þeir eru með barna og unglingageðdeild, þeir eru með barnaspítala og öll meðferð barna fer fram inn á þar tilgerðum stofnunum fyrir börn. Og það er ekki að ástæðulausu“.
