Íslenska ríkinu hefur verið gert að greiða ljósmóður á Landspítalanum rúmlega tvær milljónir í bætur vegna slyss sem hún varð fyrir þegar hún var á leið sinni til vinnu á næturvakt á spítalanum. Slysið átti sér stað í byrjun árs 2014. Konan krafðist bóta á þeim forsendum að hún var ríkisstarfsmaður á leið til vinnu þegar slysið átti sér stað. Lögmaður ríkissins lagði hins vegar fram þau rök að konan hefði gert rof á beinni leið sinni til vinnu þetta kvöld og ætti því ekki rétt á bótum frá ríkinu vegna slyss í starfi.
Forsaga málsins er sú að þann 11.janúar 2014 var konan á leið á næturvakt á Landspítalanum og hugðist kaupa sér nesti fyrir vinnuna í Hagkaup í Garðabæ. Hún stöðvaði bifreið sína við verslunina Hagkaup í Garðabæ, en þegar hún gekk um bifreiðastæðið fyrir utan verslunina var ekið á hana. hún fór til vinnu eftir slysið en leitaði síðar um kvöldið á slysadeild, og kom þá í ljós að að hún var brotin utanvert á sköflungshnúa í vinstra hné. Hún gekkst í kjölfarið undir aðgerð. Fyrir dómi hélt konan því fram að slysið hefði valdið henni skertri gönguhæfni, litlu kuldaþoli og verkjum við gang auk þess sem það hefði haft áhrif á nætursvefn hennar.Afleiðingarnar hefðu því háð henni bæði í vinnu og frítíma. Henni voru metin 10 miskastig í örorkumati.
Konan krafðist í kjölfarið slysabóta á þeim forsendum að hún hefði verið sólarhringstryggð vegna slyss samkvæmt kjarasamningi. Í kjölfarið fékk hún greiddar bætur á grundvelli reglna um skilmála slysatryggingar ríkisstarfsmanna samkvæmt kjarasamningum vegna slysa sem starfsmenn verða fyrir utan starfs.
Ágreiningsefni málsins snerist hins vegar um það að konan taldi sig eiga rétt á bótum frá ríkinu vegna slyss í starfi þar sem hún hefði verið á beinni og eðlilegri leið til vinnu á Landspítala þegar slysið átti sér stað. Hún hefði verið ríkisstarfsmaður á slysdegi, og á verið á eðlilegri leið milli vinnustaðar síns og heimilis. Hún hefði orðið fyrir varanlegri örorku vegna slyssins. Konan taldi það hafa verið hluta af eðlilegri leið milli heimilis og vinnu að koma við og kaupa nesti fyrir næturvakt enda hefði mötuneyi Landspítalans verið lokað. Hún ætti rétt á ákveðnu svigrúmi varðandi val á leið til og frá vinnu.
Samkvæmt gildandi reglum á starfsmaður rétt á bótum vegna slyss sem hann verður fyrir í starfi sínu eða á eðlilegri leið frá heimili til vinnustaðar síns og frá vinnustað til heimilis. Sama gildir í matar- og kaffitíma á matstað og um ferðir milli vinnustaðar og matstaðar í matar- og kaffihléum.
Rök íslenska ríkisins voru hins vegar þau að konan hefði gert rof á beinni leið til og frá vinnu og því ættu þessar reglur ekki við í þessu tilviki. Litið var slysið sem „frítímaslys.“ Þá var tekið fram að konan hefði fengið mánaðarfrest til að gera athugasemdir eftir að henni var tilkynnt um fyrri bótafjárhæðina. Engar athugasemdir hefðu hins vegar borist frá henni. Hún hefði þannig fyrirgert hugsanlegum rýmri bótarétti.
Í málflutningi ríkisins var einnig dregið í efa að erindi konunnar í Hagkaupsverslunina þetta kvöld hefði verið að kaupa sér nesti fyrir 21 tíma næturvakt. Dómurinn taldi það þó réttmæta útskýringu. Þá kemur fram í dómnum að Hagkaups verslunin sé við þá stofnbraut sem konan ók um umrætt kvöld. Þá sé því talinn eðlilegur þáttur í ferðalagi hennar til vinnu á þessum tíma að nesta sig á leiðinni. Héraðsdómur dæmdi konunni því konunni í vil. Sem fyrr segir er ríkinu gert að greiða henni rúmar tvær milljónir í bætur, auk málskostnaðar.
