Verslunarstjóra Bónus í Vestmannaeyjum hefur verið sagt upp störfum og rannsókn er hafin hjá lögreglu á meintum auðgunarbrotum starfsmannsins hjá lögreglunni í Vestmannaeyjum.

Samkvæmt heimildum DV er verslunarstjórinn fyrrverandi grunaður um fjárdrátt og var málið kært til lögreglu. Rannsókn málsins er á frumstigi að sögn Páleyjar Borgþórsdóttur, lögreglustjóra í Vestmannaeyjum, sem staðfesti að lögreglan hafi til rannsóknar meint auðgunarbrot starfsmanns í matvöruverslun.

Guðmundur Marteinsson, framkvæmdastjóri Bónus, segir í svari við fyrirspurn DV að einstök starfsmannamál séu ekki rædd opinberlega. Hann geti þó staðfest að viðkomandi starfsmanni hafi verið sagt upp störfum.

DV hefur hvorki upplýsingar um hversu háar fjárhæðir er um að ræða í málinu, né hversu lengi hin meintu brot eiga að hafa staðið.