Þeim fækkar stöðugt ökumönnum sem tala í farsíma án handfrjáls búnaðar. 47 prósent Íslendinga hafa talað í farsíma undir stýri án handfrjáls búnaðar á síðastliðnum 12 mánuðum en það er 9 prósentustiga fækkun frá sömu könnun fyrir ári síðan. Á móti hefur fjöldi þeirra sem tala í farsímann með handfrjálsum búnaði aukist nokkuð og stendur nú í 44 prósent.
Þetta kemur fram í niðurstöðum nýjustu könnunnar MMR. Ef litið er á þróun yfir tíma má sjá að þeim sem tala í símann undir stýri án handfrjáls búnaðar hefur fækkað stöðugt frá árinu 2010. Þannig kváðust 47 prósent svarenda tala í símann án handfrjáls búnaðar í síðustu könnun MMR en 71 prósent árið 2010. Á móti hefur fjöldi þeirra sem tala í símann undir stýri með handfrjálsum búnaði aukist úr 24 prósent árið 2010 í 44 prósent árið 2017. Eins hefur fjölda þeirra sem ekki hafa notað farsíma undir stýri síðastliðna 12 mánuði aukist um 6 prósentustig, úr 17 prósent árið 2010 í 23 prósent árið 2017.
Fólk á aldrinum 18 – 29 ára var líklegra en fólk í öðrum aldurshópum til að segjast hafa notað farsíma undir stýri til að skrifa/lesa skilaboð (33 prósent), taka mynd (16 prósent) og til að fara á internetið (17 prósent). Það er töluverð breyting frá árinu 2016. Þá voru konur líklegri en karlar til að segjast ekki hafa notað farsíma undir stýri síðastliðna 12 mánuði.
Fólk sem búsett var á landsbyggðinni (50 prósent) reyndist líklegra en fólk sem búsett var á höfuðborgarsvæðinu (44 prósent) til að tala í símann undir stýri án handfrjáls búnaðar.
Auk þess kom í ljós að því lægri heimilistekjur sem svarendur höfðu því líklegri voru þeir til að nota ekki farsíma undir stýri. Þannig sögðust 41 prósent þeirra sem höfðu undir 250 þúsund í heimilistekjur á mánuði ekki hafa notað farsíma undir stýri síðastliðna 12 mánuði, samanborið við 15 prósent þeirra sem höfðu milljón eða meira á mánuði. Þeir svarendur sem höfðu hærri heimilistekjur voru þó líklegri til að tala í símann undir stýri bæði með og án handfrjáls búnaðar, borið saman við þá sem höfðu lægri heimilistekjur.