Þann 26. maí árið 1990 var dyrabjöllunni á heimili Marlene Warren í Flórída hringt. Marlene fór til dyra og fyrir utan stóð kona í trúðabúningi; hún var með blóm og litríkar blöðrur með áletrunum eins og: „Þú ert best“.
Konan í trúðabúningnum beið ekki boðanna heldur dró upp skammbyssu og skaut Marlene í andlitið. Marlene lést í skotárásinni og í kjölfarið hófst rannsókn lögreglu, rannsókn sem átti eftir að kosta blóð, svita og tár.
Nú, rúmum 27 árum síðar, hefur konan sem grunuð er um morðið verið handtekin. Hún heitir Sheila Keen Warren en á þeim tíma sem morðið var framið hafði hún átt í leynilegu ástarsambandi með eiginmanni Marlene, Michael Warren.
Michael og Sheila unnu saman en strax eftir morðið komst lögreglan að því að þau hefðu átt í ástarsambandi. Af þeirri ástæðu var Sheila meðal grunaðra en lögregla taldi sig ekki hafa nægileg sönnunargögn til að ákæra hana.
Tveimur árum eftir morðið var Michael dæmdur í fangelsi fyrir fjársvik og sat hann inni í þrjú ár. Árið 2002 gekk hann svo í hjónaband með annarri konu, títtnefndri Sheilu Keen Warren.
Flest benti til þess að málið myndi aldrei leysast en árið 2014 hófst rannsóknin á nýjan leik. Það sem tengdi Sheilu við morðið voru niðurstöður DNA-rannsóknar sem þótti sýna að hún hefði verið á vettvangi þegar morðið var framið. Sheila hefur því verið ákærð fyrir morðið en ekki liggur fyrir hvort fyrrverandi eiginmaður Marlene – og núverandi eiginmaður Sheilu – verði einnig ákærður.
