Eins og DV greindi frá varð sprenging á 11. tímanum í dag í bílskúr við fjölbýlishúsið Skipholt 45. Tilkynnt var að þrír hefðu slasast í sprengingunni og miklum eldsvoða sem hófst í kjölfarið.
Nú hefur fengist staðfest að gaskútur í tjaldvagni sem staðsettur var í bílskúrnum hafi valdið sprengingunni
Varðstjóri hjá Slökkviliðinu staðfestir að einn maður hafi verið færður á slysadeild. Einnig að tveir aðrir menn hafi hlaupið af vettvangi áður en lögregla og slökkvilið kom á svæðið. Lögreglan reynir nú að hafa uppi á mönnum tveimur og hvetur þá til að gefa sig fram. Ekki er vitað hvort mennirnir séu íslenskir eða erlendir en þeir eru sennilega um þrítugt. Talið er að mennirnir hafi slasast í sprengingunni en ekki er vitað hversu alvarlega.
Vísir greinir frá því að bílskúrinn hafi verið innréttaður sem heimili.