„Ég ætla að ræða við tvo alþingismenn, varaþingmann og varaformann Vinstri grænna Björn Val Gíslason og Brynjar Níelsson, einhverja þekktustu strigakjaftar íslenskra stjórnmála,“ sagði Björn Ingi Hrafnsson og hló þegar hann hóf þátt sinn Eyjan sem sýndur er á ÍNN og bætti við: „Ég bara varð að segja þetta.“ Síðan sneru þremeningarnir sér að alvarlegri málum.
Brynjar Níelsson alþingismaður Sjálfstæðisflokksins og Björn Valur Gíslason varaformaður Vinstri grænna voru gestir hjá Birni Inga Hrafnssyni í þættinum Eyjan í gær. Brynjar er formaður stjórnskipunar- og eftirlitsnefndar Alþingis en Björn Valur á í dag sæti í bankaráði Seðlabanka Íslands. Í þættinum var rifjuð upp heimsókn Más Guðmundssonar í þáttinn viku áður.
Björn Ingi benti á að bankaráð Seðlabankans hefði sett ofan í við Má fyrir að hann færi í ítrekuð viðtöl á Eyjunni og ræddi þar mál sem væru í gangi. Björn Ingi spurði Björn Val bankaráðsmann í Seðlabankanum af hverju bankaráðið hefði átalið seðlabankastjóra. Björn Valur svaraði:
„Ég ætla ekki að ræða það sem við gerum í bankaráði umfram þetta sem hefur komið fram þ. e. a. s. þetta gagn er komið þarna fram. Ég held að ástæðan hafi bara verið sú að það sé ekki gott, hvorki fyrir starfsmenn bankans, bankaráð eða stjórnendur að vera að ræða málefni einstakra aðila, hvort sem það eru einstaklingar eða fyrirtæki. Ég held það sé bara ágætt fyrir banka af þessu tagi, þ. e. a. s. Seðlabanka Íslands í þessu tilfelli, að sleppa því. Ég ætla nú að gera það hérna. Það getur ýmislegt verið sagt í hita leiksins sem kann að hafa áhrif á mál frá báðum hliðum og menn misskilja og mistúlka og geta haft sínar skoðanir á því hvar sem er,“
Þá var rætt um mál Gjaldeyriseftirlits Seðlabankans sem hefur sakað Samherja um að hafa brotið gjaldeyrislög. Eina sem kom út úr því var stjórnvaldssekt. Um það sagði Björn Valur:
„Já, já. Þetta er stórt fyrirtæki sem þarna um ræðir. Eitt af stærstu fyrirtækjum landsins og gríðarlega umfangsmikið með starfsemi víða um heim. Jú, það má auðvitað segja það þegar eftirtekjan er sú að það er beitt stjórnvaldssekt upp á nokkrar milljónir, þá hafi málið allavega ekki endað með þeim hætti sem lagt var af stað með.“
Miklar ásakanir hafa verið settar fram í Samherjamálinu. Brynjar Níelsson þingmaður Sjálfstæðisflokksins hafði þetta að segja.
„Það sem kannski er alvarlegi hlutinn er það að í raun og veru er Seðlabankinn sakaður um það að hafa brotið reglur og lög, meira að segja sem gæti varðað refsingum. Þegar slíkar ásakanir eru uppi þá eru þær mjög alvarlegar.“
Hér fyrir neðan má horfa á innslagið í heild sinni:
Eyjan 30. mars – þriðji hluti from inntv on Vimeo.