„Guð minn góður. Hún er enn hérna,“ sagði ónefndur starfsmaður Góða hirðisins þegar blaðamaður DV hringdi til þess að fá frekari upplýsingar um notaða gervipíku sem var til sölu í versluninni í dag. Kynlífsleikfanginu, sem kostaði 1.500 krónur, var snarlega kippt úr sölu og verður það að teljast sigur fyrir almannahagsmuni enda leikfangið í meira lagi sjúskað.

Að sögn starfsmannsins berst talsvert magn af kynlífsleikföngum til Góða hirðisins en venjulega séu starfsmenn meðvitaðir um í hverju notkun tækjanna felst og því eru þeir ekki settir í sölu. „Sá sem verðmerkti þetta hefur ekki áttað sig á því hvaða tæki þetta var.“ Að sögn starfsmannsins verður tólinu fargað.