Linda McMahon stofnaði og stýrði WWE þar sem Trump situr í frægðarhöll glímutrölla
Donald Trump, verðandi Bandaríkjaforseti, heldur áfram að skipa í embætti í kringum sig áður en hann tekur við í janúar næstkomandi. Nýjasta skipan hans hefur vakið athygli en hún sneri að því að ráða í stöðu yfirmanns SBA (e. Small Business Administration) sem er sjálfstæð stofnun bandarísku ríkisstjórnarinnar sem tryggir hagsmuni smáfyrirtækja.
Það var athafnakonan Linda McMahon sem hlaut útnefninguna en hún er hvað þekktust fyrir að stofna og stýra fjölbragðaglímuveldinu WWE ásamt eiginmanni sínum, Vince McMahon. Hjónin voru miklir stuðningsmenn Trumps og gáfu hátt í sex milljónir dala til kosningabaráttu hans, í gegnum svokallaða Super Pac-sjóði. Linda hefur í tvígang boðið sig fram til öldungadeildarþingmennsku fyrir Repúblikanaflokkinn, 2010 og 2012, en ekki haft erindi sem erfiði. Á Twitter-síðu sinni segir hún það mikinn heiður að fá útnefninguna.
Trump þekkir vel til McMahon-hjónanna en sjálfur hefur hann komið fram í glímuviðburðum WWE og gott betur því hann var tekinn inn í frægðarhöll sambandsins á sínum tíma, þar sem hann situr á stalli með Hulk Hogan og fleiri köppum.