„Í morgun varð einn nemenda okkar fyrir því að ókunnugur maður bauð honum upp í bíl.“ Á þessum orðum hefst orðsending til foreldra Snælandsskóla en um klukkan 8 í morgun varð 9 ára nemandi skólans fyrir því að maður á svörtum jepplingi stoppaði hann nálægt undirgöngunum á Nýbýlavegi.

Maðurinn stöðvaði drenginn, sem var á leiðinni í skólann, með þeim orðum að móðir hans hefði slasast í umferðarslysi. Drengurinn brást hárrétt við aðstæðum, hljóp í burtu og sagði frá. Málið var umsvifalaust tilkynnt til lögreglu.

Mikilvægt að ræða við börnin

Í orðsendingunni frá Magneu Einarsdóttur, skólastjóra Snælandsskóla biðlar hún til foreldra að ræða við börnin sín og minna þau á að fara aldrei upp í bíl með ókunnugum.

Í samtali við DV segir Magnea að drengnum sé nokkuð brugðið. Móður hans var tilkynnt um málið og kennarar voru beðnir um að ræða atvikið í sínum umsjónarbekkjum í morgun.

Sá ekki framan í manninn

Drengurinn gat þó ekki gefið lýsingu á manninum en hann segist hafa séð illa framan í hann.

Stöðvarstjóri lögreglustöðvarinnar við Dalveg. Þóra Jónasdóttir, staðfestir að málið sé í rannsókn og vill koma þeim skilaboðum áleiðis til foreldra sína að brýna fyrir börnunum sínum að láta ekki plata sig upp í bíla hjá ókunnugu fólki.