Sagði við móður sína að hana langaði að prófa fíkniefni – Neysla vímuefna getur verið dauðans alvara
„Eftir eineltið missir hún aðeins virðinguna fyrir sjálfri sér,“ segir Kristín Frímannsdóttir, móðir Ingibjargar Melkorku Ásgeirsdóttur, sem lést í fyrrasumar, 17 ára gömul, eftir að hafa tekið inn eina og hálfa e-töflu. Kristín ræðir dauða dóttur sinnar í kvöldfréttum Stöðvar 2 í kvöld.
Ingibjörg var fædd 8. mars árið 1998 og var því nýorðin sautján ára þegar hún lést. Í broti úr umfjölluninni á vef Vísis kemur fram að Ingibjörg hafa snemma orðið utanveltu félagslega og í skólakerfinu. Þannig hafi hún verið greind með ofvirkni og athyglisbrest og eftir að hafa orðið fyrir einelti í grunnskóla hafi hún veikst andlega. Í viðtalinu við Stöð 2 segir Kristín að skólakerfið þurfi að taka betur á málum barna sem glíma við fjölþættan vanda líkt og Ingibjörg gerði.
Kristín segir að dóttir hennar hafi alveg verið til í að ögra sér og taka áhættu. Hún hafi í raun litið á lífið sem stoppistöð en ekki áfangastað og raunar verið búin að segja við móður sína að hana langaði til að prófa fíkniefni.
„Ég var náttúrulega að reyna að segja segja henni að það væri mjög óskynsamlegt, maður var svo sem oft búin að fara með henni yfir það . En hún var líka búin að segja mér að hún ætlaði að prófa þetta en það væri svo skrýtið að hún hefði þá tilfinningu að hún myndi ekki lifa þetta af. Hana langaði samt að prófa. Það var bara forvitni, að vita hvernig þetta virkar,“ segir Kristín í viðtalinu en Ingibjörgu er lýst sem góðhjartaðri og kröftugri stúlku sem hafði ríka réttlætiskennd.
Kristín sagði að dóttir hennar hafi ekki verið í fíkniefnum og ekki hafa tekið inn e-töflur áður en hún lést. Í viðtalinu kemur fram að enginn einstaklingur á Íslandi hafi dáið með eins lítið magn af e-töflum í blóðinu og hún gerði.
Ingibjörg Melkorka var búsett á Akranesi og lét hún eftir sig foreldra, fjórar systur og einn bróður. Hún var nemandi í Menntaskóla Borgarfjarðar veturinn áður en hún lést en áður stundaði hún nám í Brekkubæjarskóla á Akranesi og í Heiðarskóla í Hvalfjarðarsveit.
Eins og kom fram í umfjöllun DV síðastliðið sumar sofnaði Ingibjörg eftir að hafa innbyrt eina og hálfa e-töflu aðfaranótt 31. maí á síðasta ári. Hún vaknaði ekki aftur og var úrskurðuð látin á gjörgæsludeild Landspítalans við Hringbraut aðfaranótt þriðjudagsins 2. júní.
Sem fyrr segir var þetta í fyrsta og eina skipið sem Ingibjörg hafði neytt e-taflna. Afleiðingarnar voru skelfilegar. „Von okkar er að þessum skilaboðum verði komið út í samfélagið sem víðast, öðrum til aðvörunar um þá dauðans alvöru sem neysla vímuefna getur haft,“ sögðu aðstandendur í yfirlýsingunni.