Vonlaust að vera á átta manna bíl og leggja í eitt stæði – Fjörugar umræður um málið í hópnum Verst lagði bíllinn –
„Ég er ekki að reyna að réttlæta neitt. Ég er nú langt frá því að vera eini sem leggur í tvö stæði. En ég geri það bara þegar ég sé 2 laus hlið við hlið, hvort sem það er stutt eða langt frá inngangi,“ segir Sveinn Elías Elíasson.
Sveinn Elías komst í fréttirnar haustið 2013 þegar hann lagði Range Rover-glæsikerru sinni í tvö stæði fyrir fatlaða við inngang Vínbúðarinnar á Dalvegi í Kópavogi. Mikil umræða spratt upp í kjölfarið og fékk Sveinn Elías yfir sig svívirðingar frá fólki.
Þetta atvik virðist ekki hafa fallið í gleymskunnar dá því í hópnum Verst lagði bíllinn á Facebook hafa spunnist fjörugar umræður um atvikið. Kveikjan að umræðunni var gamall pistill af háðsíðunni Sannleikanum sem Viðar Eggertsson leikstjóri deildi í hópinn, en í honum var fjallað um málið á sínum tíma. Svo virðist vera sem réttlætiskennd fólks gagnvart ófötluðum sem leggja í stæði fyrir fatlaða sé sterk, svo sterk að Viðar sér ástæðu til að benda á, öðru sinni, að Sannleikurinn sé háðsíða.
Í umræðum í þræðinum er föstum skotum skotið á Svein sem svarar fyrir sig. Sveinn segist enn leggja í tvö stæði þó hann hafi ekki lagt í stæði sem ætluð eru fötluðum síðan atvikið kom upp árið 2013. Hann segist gera það þegar hann sér tvö laus stæði hlið við hlið.
„Og svo er ég á stórum jeppa í dag sem er erfitt að opna hurðarnar á án þess að hurða aðra bíla í stöðluðum stæðum. Ekkert mál að komast hjá því á yaris og smábílum. Stundum vonlaust að setja krakkana í barnastola þegar ehv er lagður svo nálægt að ég get ekki opnað hurðina,“ segir Sveinn sem er búinn að skipta Range Rover-bifreiðinni út fyrir Cadillac Escalade.
Það er ekki bannað að leggja í 2 stæði.
Í umræðunum kemur fram að það sé engin afsökun að vera á stórum bíl. Sveinn Elías segir að venjuleg bílastæði hér á landi séu allt of þröng, ef miðað er til dæmis við Ameríku. „Eins og það sé reiknað með því að íslendingar eigi allir smábíl. Og Ameríka reiknar með jeppum sem stöðluð stærð. 1000kg yaris tekur ekki beint sama pláss og 8 manna jeppi en fá jafn lítil stæði á við fólksbíla,“ segir Sveinn og bætir við að hann þurfi stóran átta manna bíl. Þá segir Sveinn að hann muni halda áfram að leggja í tvö stæði, hvað sem tautar og raular.
„Leggja rétt og leggja vitlaust og leggja ólöglega. Það er ekki bannað að leggja í 2 stæði. Á meðan það er leyfilegt samkvæmt lögum þá er ég ekkert að fara hætta því,“ segir hann.
