NFS tók við af fréttastofu Stöðvar 2 og Bylgjunnar í nóvember árið 2005 og miðlaði fréttaefni næstum allan sólarhringinn líkt og risastöðvar úti í heimi, á borð við CNN og Sky News, gera.
Þarna voru líka þungvigtar fréttaskýringa- og umræðuþættir á borð við Kompás og Silfur Egils. En fljótlega fór að halla undan fæti vegna þess að Ísland er einfaldlega of lítið mengi fyrir slíka stöð.
Sömu fréttirnar voru því síendurteknar allan sólarhringinn í sömu sviðsmynd og dagskráin varð fyrir vikið hundleiðinleg.
Í september árið 2006 skrifaði Róbert Marshall, forstöðumaður NFS, opið bréf til eigandans, Jóns Ásgeirs Jóhannessonar, titlað „Kæri Jón“ þar sem hann bað um að fá að halda stöðinni gangandi áfram.
Þann 22. september sama ár var NFS lokað.
