Tveimur mínútum eftir að Lyndsey fæddi dóttur sína, fæddi hún hina dóttur sína. Hún hafði ekki hugmynd um að hún ætti von á tvíburum þar sem aðeins eitt barn sást á öllum sónarmyndum. Hún segir The Sun sögu sína.
Eldri tvíburinn fékk nafnið Ada Maze og systir hennar fékk nafnið Billie June.
Systir Lyndsey náði myndum af þessu ótrúlega augnabliki, þegar Lyndsey áttaði sig á að hún hafi eignast tvíbura.
Lyndsey fæddi börnin í fæðingarlaug á spítalanum. Hún og eiginmaður hennar, Wesley, horfðu á hvort annað í algjöru áfalli þegar Billie June kom í heiminn.
„Ég var strax með mínar efasemdir þegar ég fékk Adu í fangið. Mér fannst skrýtið hvað hún væri lítil,“ segir Lyndsey.
Lyndsey og Wesley áttu fyrir soninn Django sem var helmgini stærri við fæðingu en Ada.
„Ég var búin að þyngjast tvöfalt meira á meðgöngunni en á fyrri meðgöngun, þannig ég skildi ekki af hverju Ada var svona lítil,“ segir hún.
Eftir að Ada kom í heiminn leið stutt stund þar til Lyndsey fann þörf til að halda áfram að rembast. Hún segir að hún hafi ekki geta lýst því með orðum hvað væri að gerast, hún bara vissi að hún væri að fara að eignast annað barn.
„Það voru allir í herberginu í sjokki. Eiginmaður minn var í áfalli, systir mín var að taka myndir og ég held að ekkert okkar hafi haft hugmynd um hvernig okkur ætti að líða. Ég var sjálf í áfalli. Þetta var mjög yfirþyrmandi og ég ákvað að vera bara í augnablikinu. Ég held að andlit mitt segi alla söguna. Ég hef örugglega slegið heimsmet í að öskra oftast „guð minn góður“ á tíu mínútum,“ segir hún.
Lyndsey og fjölskyldan eru mjög hamingjusöm í dag og myndu ekki vilja breyta neinu.
Sást ekki á sónarmyndum
Lyndsey á upptöku af ómskoðun frá meðgöngunni. Hún sér aðeins eitt barn á upptökunni, þó svo að hún viti að þau séu tvö.
„Ég held að ástæðan fyrir því að aðeins eitt barn hafi sést var því það var ekki verið að leita að tveimur börnum. Ég held að ef það hefði verið leitað að tveimur börnum, þá hefðu þau fundið tvö,“ segir hún.
„Ég elska að skoða myndirnar frá fæðingunni því mér finnst þær sýna nákvæmlega hvernig mér leið,“ segir hún.
