Fyrrum eiginmaður Tiger King stjörnunnar Carole Baskin, Don Lewis, hvarf árið 1997 og var formlega sagður látinn árið 2002. Hafin er rannsókn á hvarfi hans og höfðar fjölskylda Lewis nú mál gegn Baskin. Fjölskylda Lewis tilkynnti þetta á blaðamannafundi í gær. Sky News segir frá.
Fjölskyldan býður 100.000 bandaríkjadali, sem samsvarar um 13,7 milljónum íslenskra króna, fyrir upplýsingar um hvarf hans. Don Lewish hvarf eftir að hafa yfirgefið heimili sitt í Tampa, Flórída.
Í Netflix þáttunum Tiger King var ítrekað fjallað um ásakanir Joe Exotic þess efnis að Baskin hafi myrt eiginmann sinn og mögulega fætt tígrisdýr sín með líkamsleifum hans. Fyrr á þessu ári var Joe Exotic dæmdur í 22 ára fangelsi fyrir að reyna að ráða annan einstakling til að myrða Baskin.
Baskin hefur ekki verið ákærð fyrir neinn glæp og hefur hún ítrekað sent frá sér yfirlýsingar til að hrekja ásakanir á hendur henni í þáttunum.
