Réttarhöld í máli leikarans Johnny Depp gegn fjölmiðlinum The Sun halda áfram. The Sun fullyrti í fréttaflutningi sínum að Depp væri ofbeldismaður og höfðaði Depp þetta meiðyrðamál til að hreinsa mannorð sitt. Fyrir dómi er því reynt að leiða í ljós hvort að ásakanir um ofbeldi Depp gegn fyrrum eiginkonu sinni, Amber Heard, eigi við rök að styðjast.
Fyrir dómi var í dag lögð fram mynd sem sýnir Depp liggja áfengisdauðan og hefur hann hvolft yfir sig íláti af ís. Heard mun hafa tekið myndina til að sýna Depp hversu „aumkunarverður“ hann væri orðinn.
Depp hélt því fram að þessi tiltekna mynd hafi verið tekin þegar hann var nýkominn úr löngu flugi.
„Ég var að undirbúa mig undir ferð til Bahamas þar sem ég ætlaði í afeitrun við ópíóðum og þarna hafði ég verið að vinna 17 klukkustunda vinnudaga. Hún bað mig um að halda á ísnum sínum. Ég var með hægri hönd í vasanum og ísinn í hinni. Ég var greinilega örmagnaður og mjög þreyttur, við það að sofna og ísinn sullaðist yfir mig fótinn á mér. Þá tók hún þessa mynd og sýndi mér daginn eftir og sagði „Sjáðu hvernig þú ert orðinn, sjáðu þig, aumkunarvert.“
Heard hefur meðal annars sakað leikarann um að hafa ráðist á hana með ofbeldi og formælingum á 30 ára afmæli hennar, og hent í hana kampavínsflösku. Hafi hann ítrekað dregið hana á hárinu og lagt á hana hendur.
Depp heldur því aftur á móti fram að það hafi verið Heard sem hafi beitt ofbeldi í sambandinu og hafi hún að jafnaði átt frumkvæðið að öllum þeirra rifrildum.
Reiknað er með að réttarhöldin taki allt að þrjár vikur áður en málið verður lagt í dóm.
