Lilliana Schalk, klappstýra frá Norður-Kentucky í Bandaríkjunum, er látin, aðeins þrettán ára að aldri. Andlát Lilliönu hefur vakið mikla athygli vestan hafs, en hún þótti afar upprennandi klappstýra með framtíðina fyrir sér í faginu.
Það er einna helst út af dánarorsök Lilliönu að mál hennar vekur athygli. Lilliana var að keppa á klappstýrumóti í febrúar og leið illa í miðri keppninni. Faðir hennar fór með hana á bráðamóttökuna eftir að hún kvartaði undan verkjum í mjaðmagrindinni og sagði aðra höndina vera dofna. Í kjölfarið versnaði ástand Lilliana mikið á stuttum tíma, allt þar til hún lést.
Nú sýna niðurstöður krufningar að Lilliana lést úr streptókokka. Í tilkynningunni frá fjölskyldu klappstýrunnar, sem sagt er frá á vef Heavy, kemur fram að sýkingin hafi lamað ónæmiskerfi hennar án nokkurrar viðvörunar.
„Við vissum að þessi skýrsla væri væntanleg og erum í sannleika sagt tvístígandi yfir þessu. Þetta breytir annars vegar engu fyrir okkur en á hinn bóginn myndum við ekki óska neinum að lenda í þessari martröð. Kannski getur þessi skýrsla hjálpað til við að koma í veg fyrir að svipað gerist fyrir aðra. Lilliana myndi sannarlega hjálpa ef hún gæti þannig að þetta er bara framlenging á anda hennar,“ segir í tilkynningunni.
