Ljósmyndarinn Angela Forker hefur vakið mikla athygli fyrir nýjustu myndaseríu sína sem hún kallar „Dýrmæta barna verkefnið“ eða „The Precious Baby Project.“ Myndirnar eru teknar af börnum með mismunandi sérþarfir og hefur hún nú þegar birt 23 myndir.
„Mig langar til þess að vekja athygli á börnum með sérþarfir ásamt því að vekja upp von og hvatningu fyrir fjölskyldur þeirra. Á sama tíma vil ég gefa þeim listaverk sem þau geta átt til æviloka,“ sagði Angela í viðtali við HuffPost.
„Í febrúar á þessu ári þá áttaði ég mig á því að nýburamyndartaka myndi henta fullkomlega fyrir börn með sérþarfir þar sem þau geta ekki setið í myndatökum, það eru margir ljósmyndarar sem eiga í vandræðum í þeirri stöðu.“
Hver einasta mynd er hönnuð með veikindi hvers barns í huga eða þá í samvinnu við fjölskylduna með áhugamál þeirra í huga. Eitt dæmi er mynd af barni sem þarf að vera með hjálm á hausnum ásamt því að vera með súrefni tengt í sig. Myndin var því gerð af því barni sem geimfara.
„Ég vildi að hann vissi að takmörk hans miðast við geiminn. Þegar hann verður fullorðinn og sér þessa mynd þá vil ég að hann trúi því að hann geti gert allt.“
Önnur mynd sem Angela tók var af Ellis Rose sem var ekki hugað líf lengur en í 6-12 mánuði. Angela kallar þá mynd „Forget me not fairy“ eða „Gleymdu mér ey álfur.“
„Hún heitir Ellis Rose svo ég setti rósir inn á myndina. Hún er svo mikil blessun fyrir fjölskylduna sína sem ættleiddi hana sérstaklega vegna sérþarfa hennar. Að sjálfsögðu er hún gleymdu mér ey álfur því jafnvel þótt hún gæti yfirgefið þau fljótlega þá munu þau aldrei gleyma henni.“
Myndir Angelu hafa verið til sýnis á spítölum og læknastofum og vonast hún til þess að geta gefið þær út í bók eða dagatal til þess að geta safnað fyrir börn með sérþarfir.