Söngvarinn, gítar- og hljómborðsleikarinn Pétur Örn Guðmundsson er alinn upp á miklu tónlistarheimili og hefur komið víða við á tónlistarsviðinu, bæði í hljómsveitum, Eurovision, tónleikum og sýningum. Framundan eru tónleikar með hljómsveitinni Dúndurfréttum.

DV heyrði í móður Péturs Arnar, kennaranum Olgu Clausen, og spurði: Hvað segir mamma um soninn?

„Það fyrsta sem kemur upp í hugann þegar talað er um Pétur minn er kærleikur, fjölskylda og tónlist. Hann var ekki orðinn tveggja ára þegar hann bað okkur um að spila fyrir sig helstu rokkstjörnur ársins 1973. Hann beygðist snemma krókurinn. Hann bað okkur foreldrana að spila „hvisshviss“ og átti þá við Thick As A Brick með Jethro Tull og svo „klukkurnar“ sem var Dark Side Of The Moon, Pink Floyd. Hann skynjaði snemma hljóðheim á annan hátt en jafnaldrar hans. Hann var alinn upp við mikla tónlist, kominn af tónlistarfólki í báðar ættir og pabbinn tónlistarmaður. Hann vildi stundum fara sínar eigin leiðir og  hræddi úr foreldrunum líftóruna með uppátækjum eins og þeim að læðast út eftir að búið var að lesa fyrir hann og svæfa, eða það héldum við. Hann settist á þríhjólið sitt og hjólaði á náttfötunum yfir Ölfusárbrú til að heimsækja ömmu sína og afa. Hann er mikill dýravinur og elskar kettina sína heitt. Reyndar missti hann Snældu sína á miðvikudag og er í sorg. Hann hefur ásamt systrum sínum, Söru og Rakel, iðulega grætt mömmu sína með stórum gjöfum eins og tónleikamiðum eða utanlandsferðum. Við erum miklir vinir og hann er svolítill mömmustrákur.“

Pétur Örn ásamt foreldrum sínum, Guðmundi Benediktssyni og Olgu Clausen.