Ajibola Taiwo frá Nígeríu reyndi í sautján ár að verða ólétt. Þann 11. maí á þessu ári gerðist svo kraftaverk. Hún eignaðist ekki eitt barn, ekki tvíbura, heldur sexbura! Hún eignaðist þrjár stúlkur og þrjá drengi í Virginíu í Bandaríkjunum. Börnin komu í heiminn með keisaraskurði og komu allt að 40 manns að fæðingunni. Cosmopolitan greinir frá.
Ajibola var komin 30 vikur og tvo daga á leið. Öll börnin fæddust agnarsmá, það minnsta var aðeins hálft kíló á þyngd. Til allrar hamingju voru þau öll í góðu ástandi samkvæmt tilkynningu VCU: „Miðað við að þau séu fyrirburar, þá eru þau í mjög góðu ástandi.“ Sama á við um móðurina sem var útskrifuð af sjúkrahúsinu viku seinna.
Nýbökuðu foreldrarnir eru duglegir að koma á sjúkrahúsið og halda börnunum upp við húðina sína, æfing sem hjálpar fyrirburum að dafna og auðveldar brjóstagjöf.
Við óskum foreldrunum innilega til hamingju og vonum að þau fái góða hvíld áður en börnin koma heim. Það verður örugglega erfitt fyrstu mánuðina að fá þau öll til að sofa á sama tíma!
