Mæðgurnar, Sólveig og Hildur, halda úti bloggsíðunni maedgurnar.is þar sem þær deila gómsætum uppskriftum með fallegum myndum. Þær deildu nýlega uppskrift að Ratatouille með kartöflumús og fékk Bleikt góðfúslegt leyfi að deila henni með lesendum.

Í svona fallegu vetrarveðri finnst okkur tilvalið að bjóða upp á dásamlegt ratatouille með heimalagaðri kartöflumús. Máltíðin er stútfull af góðu grænmeti og rennur ljúflega niður með gómsætri kartöflumúsinni.

Framkvæmdin er ekki flókin, en það þarf að byrja að huga að matseldinni með ágætum fyrirvara því við bökum kartöflurnar fyrir kartöflumúsina í 1 – 1 ½ klst. Þetta er reyndar hægt að gera löngu áður en byrjað er að elda hitt, því það eina sem þarf að gera er að setja kartöflurnar inn í ofn og bíða. T.d. má alveg baka kartöflurnar kvöldið áður og geyma í kæli.

Ratatouille-ið sjálft er ofureinfalt. Við byrjum á að baka grænmetið í ofninum í 12-15 mín, og blöndum því svo út í bragðgóða tómatsósuna.

Uppskrift fyrir 4-6

Kartöflumús úr bökuðum kartöflum

4 bökunarkartöflur
2 msk ólífuolía eða vegan smjör eða ykkar uppáhalds olía/smjör
1 tsk sjávarsaltflögur
nýmalaður svartur pipar
1 heill hvítlaukur (ef vill)

1. Skolið kartöflurnar og bakið heilar með því að setja þær á bökunarplötu og inn í ofn og bakið við 200°C í um 1 – 1 ½ klst eða þar til þær eru alveg tilbúnar.
2. Samtímis er gott að baka heilan hvítlauk í ofninum, en taka hann út eftir u.þ.b. ½ klst.
3. Afhýðið kartöflurnar og hvítlaukinn og stappið saman við ólífuolíu, eða þá fitu sem þið kjósið að nota.
4. Kryddið með sjávarsaltflögum og nýmöluðum svörtum pipar

Ratatouille

1 rauðlaukur, afhýddur og skorinn í u.þ.b. 2×2 cm bita
1 eggaldin, skorið í fernt eftir endilöngu og síðan í ½ cm bita
1 kúrbítur, skorinn í tvennt eftir endilöngu og síðan í ½ cm sneiðar
1 rauð papríka, steinhreinsuð og skorin í 2×2 cm bita
1 gul papríka, steinhreinsuð og skorin í 2×2 cm bita
1 appelsínugul papríka, steinhreinsuð og skorin í 2×2 cm bita
15 kirsuberjatómatar, skornir í tvennt
4-5 greinar ferskt tímjan
2 msk kókosolía eða önnur hitaþolin olía
1 tsk rósmarín
1 tsk sjávarsalt
nýmalaður svartur pipar

1. Hitið ofninn í 180°C
2. Setjið bökunarpappír á ofnplötu
3. Skerið grænmetið í bita og setjið á ofnplötuna
4. Veltið grænmetinu upp úr olíunni og kryddið með rósmarín, salti og svörtum pipar
5. Bakið við 180°C í um 12 – 15 mín

Sósan

1 glas (400ml) tómatpassata
3 msk tómatpúrra
5 hvítlauksrif, marin
½ tsk tímjan
½ tsk rósmarín
¼ tsk cayenne pipar
1 tsk sjávarsaltflögur
1 krukka kjúklingabaunir, ef vill – má sleppa

1. Setjið allt saman í pott, hitið og hrærið
2. Bætið grænmetinu út í og látið malla í 2 mín
3. Berið fram með heimagerðri kartöflumús
4. Ef þið viljið hafa meiri sósu þá er upplagt að tvöfalda sósu uppskriftina