„Ég get ekki með nokkru móti skilið það þegar fólk getur slökkt á slíkum tengslum eða horfið úr lífi hjá þessum saklausu sálum sem skilja ekkert í því og jafnvel taka því mjög illa,“ segir Glódís Alda Baldursdóttir. Hún hefur börn fyrrverandi maka síns hjá sér eina helgi í mánuði og hefur þetta fyrirkomulag vakið ótrúlega jákvæða athygli. Heiða Ósk móðir barnanna sagði frá yndislegum samskiptum og skipulagi þeirra í einlægum pistli á hér á Bleikt í gær. Barn Glódísar eyðir líka einni helgi í mánuði á heimili Heiðu Óskar með hálfsystkynum sínum. Fólki þykir aðdáunarvert að konurnar setji hag barnanna í forgang með þessum þroskaða hætti, enda hefði auðveldlega getað haft mikil áhrif á samverustundir barnanna að Glódís og faðir þeirra slitu samvistum.

Glódís tjáir sig sjálf um ástæður sínar á Facebook. Þar segir hún meðal annars:

Það var „pakki“ eins og það er oft orðað en það truflaði mig ekki og eftir að ég kynntist þeim urðu þau bara blessun í mínum augum. Ég hef hugsað um þau frá því þau voru 4,5 og 11 ára gömul, semsagt í fjögur ár. Ég hef fætt þau, klætt þau, hlegið með þeim, huggað þau, tekið þátt í þeirra starfi bæði í leikskóla og skóla, hjálpað þeim að læra, frætt þau um lífið, svarað þeirra vangaveltum, ferðast með þeim um landið og ég get lengi talið. Ein blessunin í viðbót bættist í hópinn og er hann nýorðinn eins árs gamall.

Síðan Glódís og faðir barnanna slitu samvistum hefur fengið mikið af spurningum og athugasemdum varðandi fyrirkomulag þeirra í dag. Flestar hafa verið jákvæðar en skiljanlega veltir fólk þessu aðeins fyrir sér.

„Ég hef fengið mikið hrós fyrir það en einnig fengið spurningar sem hljóma svona „Af hverju ertu ennþá að taka krakkana hans?„- „Hvernig nennir þú þessu?“ – „Er þetta ekki of mikið fyrir þig?“ – „Ætlar þú að taka þau reglulega alla ævi?“ og fleiri svipaðar þessum.“

Smelltu HÉR til að lesa pistlil Heiðu Óskar

Glódís segir að ákvörðun sín hafi verið einföld. „Fyrir mér var ég aldrei stjúpmamma, ég var „all in“ í mömmuhlutverkinu aðra hverja helgi, þess á milli þegar þau hringdu og meira á sumrin. Ég var meðal annars ein með þau heilt sumar þegar pabbi þeirra var að vinna í útlöndum og aldrei sleppti ég „pabba“ helgunum. “

Glódís og Heiða Ósk ákváðu að festa eina helgi í mánuði þar sem börn Heiðu Óskar koma til Glódísar í svokallaða „Glódísarhelgi“ og eina helgi í mánuði fer sonur Glódísar til Heiðu Óskar og systkina sinna.

„Það heldur ekki bara tengslunum milli mín og þeirra heldur einnig milli þeirra og litla bróður þeirra sem mér finnst mjög mikilvægt.“

Strax eftir skilnaðinn talaði Glódís við bæði Heiðu Ósk og föður barnanna og sagðist vilja fá að halda áfram að vera í lífi þeirra og sjá þau vaxa og dafna. „Ég tengdist þessum börnum inn að hjartarótum bókstaflega og það get ég ekki bara látið hverfa með því að smella fingri. Þó svo að sambúðin slitnaði get ég ekki hugsað mér að hverfa úr lífi þeirra eða þau úr mínu.“

Glódís segir að það sé allt of mikið um að fólk byrji saman og skilji og litlu krílin verði undir á einhvern hátt.

„Mér finnst oft tilfinningar barna vanmetnar eða gleymdar. Börn eru alltaf blessun sama við hvaða aðstæður þau eru. Hvort ég taki þau í hverjum mánuði alla ævi get ég ekki svarað en ég mun alltaf elska þessa yndislegu gullmola og mun aldrei hverfa úr lífi þeirra.“

Sjá einnig: Glódísarhelgar: Börnin mín eiga fastar mömmuhelgar hjá annarri konu