Kvikmyndin A Walk to Remember kom út árið 2002 og naut gríðarlegra vinsælda. Myndin er byggð á bók eftir Nicholas Sparks höfund The Notebook en stúlkur um allan heim féllu fyrir Landon Carter sem leikinn var af Shane West. Í viðtali við Entertainment Weekly viðurkenndi Mandy Moore á dögunum að hún hafi fallið fyrir Shane þegar þau léku saman í myndinni, hún var þá 16 ára en hann 24 ára.
„Shane var svo svalur. Allt við hann – hvernig hann klæddi sig, sígaretturnar sem hann reykti, tónlistin sem hann hlustaði á. Hann var karakterinn fyrir mér og það var hluti af mér sem algjörlega varð ástfangin af honum.“
Þess má geta að þau eru bæði ógift í dag og hafa margir aðdáendur myndarinnar hvatt til þess á samfélagsmiðlum að þau skelli sér á stefnumót. Sumir hafa gengið svo langt að segja að þau ættu bara að drífa sig að gifta sig sem fyrst.
