Gleðigjafinn og snapparinn Eva Ruza var veislustjóri á árlegu skemmtikvöldi Sinawik á Siglufirði sem var haldið á Rauðku miðvikudagskvöldið 9. maí. Um það bil 100 hressar konur mættu á skemmtunina sem var hin veglegasta og mikið var um dýrðir.

Boðið var upp á fordrykki, ljúffengt lambakjöt, meðlæti og dýrindis franska súkkulaðiköku í desert. Happdrætti var þar sem fyrirtæki gáfu veglega vinninga.

Skemmtiatriðin voru ekki af verri endanum, Eva Ruza kíkti í möppu Esterar með dónabröndurum og spjallaði við Jónu Guðný um Tinder menninguna á Siglufirði. Konurnar í salnum veltust um af hlátri, enda þarna skemmtilegar dömur á ferð.

Fleiri skemmtiatriði voru á dagskrá og það er alveg ljóst að skemmtikvöld Sinawik kvenna á Siglufirði er skemmtun sem vert er að taka þátt í.

Á heimasíðu Trölli.is má lesa nánar um skemmtikvöldið og sjá fleiri myndir.