Leikarinn John Heard er látinn, 71 árs gamall. Hann hafði gengist undir bakaðgerð og var að jafna sig á hóteli. Herbergisþerna kom að honum látnum.

Heard er frægustur fyrir leik sinn í gamanmyndunum Home Alone og Home Alone 2, en þar lék hann föður Macaulay Culkin, sem skildi ungan son sinn óvart eftir heima meðan aðrir fjölskyldumeðlimir héldu til Parísar. Sharon Heard, fyrrverandi eiginkona leikarans, segir hann hafa verið afar vandlátan þegar kom að því að velja hlutverk: „Hann gerði aldrei málamiðlanir. Á hverjum degi bárust honum handrit en honum stóð á sama um peninga.“ Hún segir einnig að hann hafi ekki verið hrifinn af því að vera stöðugt kenndur við Home Alone myndirnar. Uppáhaldshlutverk hans hafi verið í spennumyndinni Cutter’s Way.

Heard var kvæntur Sharon frá 1988 til 1996. Þau áttu saman tvö börn, Anniku og Max. Max lést árið 2016 í svefni. „John og Max voru báðir skapandi, þjáðir og fallegir snillingar,“ segir Sharon um fyrrverandi eiginmann sinn og son þeirra. Áður en Heard kvæntist Sharon var hann í hjónabandi með leikkonunni Margot Kidder sem stóð einungis í sex daga. Hann eignaðist son, John Matthew, með leikkonunni Melissu Leo. Siðasta eiginkona var Lara Pritchard og það hjónaband stóð í tæpt ár, en þau héldu vinskap. Sharon segir líklegt að leikarinn hafi í hugsunarleysi tekið of stóran skammt af verkalyfjum sem hafi orðið honum að bana.