Það gerist með reglulegu millibili að kvöldfréttum RÚV lýkur með hugljúfum fréttamyndum af dýrum. Pöndur eru í sérstöku dálæti hjá fréttastofunni. Þar á bæ virðast menn hafa tekið meðvitaða ákvörðun um að halda upp á sem flesta afmælisdaga pandna í hinum ýmsu dýragörðum heims með því að sýna af þeim myndir. Ekki misskilja mig, ég er ekki að kvarta. Mér finnst þessi siður mjög til eftirbreytni og horfi með aðdáun á skjáinn. Ég er mikill aðdáandi pandna sem eru með krúttlegri dýrum. Engum getur verið illa við pöndur – nema þá illmennum en hjarta þeirra er líka kalt og fullt af myrkri.
Í vikunni lauk kvöldfréttatímanum á myndum af dýri sem maður sér sannarlega ekki á hverjum degi. Þar var mætt ung en því miður munaðarlaus antílópa. „Krúttlegasta antílópa sem fæðst hefur í þennan heim,“ sagði fréttaþulurinn afdráttarlaus. Þegar maður sá antílópuna ungu hvarflaði ekki að manni að andmæla því. Hún var sannur krúttbolti. Maður varð ósjálfrátt blíður til augnanna við það eitt að sjá hana. Vonandi farnast henni vel í grimmum heimi og saknar foreldra sinna ekki um of.
