Það er gott að hlæja upphátt og alveg örugglega hollt. Maður fagnar hverjum þeim sem fær mann til hlæja, slíkar manneskjur eru sannir gleðigjafar. Anna Svava Knútsdóttir er slíkur gleðigjafi.

Nýja gamanþáttaröðin Ligeglad með Önnu Svövu sem RÚV hefur hafið sýningar á er þáttur sem kom manni í gott skap strax á fyrstu mínútunum. Anna Svava er einfaldlega drepfyndin í hlutverki hins sjálfhverfa uppistandara sem heldur til Danmerkur í ævintýraleit. Í þessum fyrsta þætti skaut hún í allar áttir, gerði grín að frægum Íslendingum og andvarpaði yfir því hversu erfitt væri að vera á Íslandi. Allt var þetta gert á svo skemmtilegan, beittan og frumlegan hátt að maður hló hvað eftir annað.

Anna Svava var stjarna þáttarins en aðrir leikarar stóðu sig með mikilli prýði. Vignir Rafn Valþórsson var mjög góður sem seinheppni listamaðurinn sem var á bótum bæði í Danmörku og á Íslandi. Helgi Björnsson var einnig verulega fyndinn sem hinn sjálfhverfi söngvari Helgi Björns. Það eru örugglega ekki allir sem náð hafa árangri í starfi sínu sem eru tilbúnir að gera stólpagrín að sjálfum sér en Helgi var sannarlega tilbúinn til þess og á hrós skilið fyrir frammistöðu sína.

Íslendingum hefur ekki alltaf tekist vel upp í gerð gamanþátta, en þarna small allt saman. Handritið var mjög fyndið og einkenndist af hugmyndaríki og talsverðri ósvífni. Leikur allra sem við sögu komu var síðan mjög góður.

Þessi fyrsti þáttur var svo vel heppnaður að það er ekki annað hægt en að hlakka til næstu fimm þátta. Svona eiga gamanþættir að vera!