Svava Sigbertsdóttir, 38 ára, skildi dóttur sína Raven eftir á Íslandi hjá foreldrum sínum árið 2004. Hún flutti til Bretlands frá Íslandi og fór í dansnám.

Dóttir hennar, sem er nú 21 árs, flutti til hennar þremur árum síðar. Faðir og fyrrum eiginmaður Svövu bjó á þessum tíma í Bandaríkjunum og var í flugnámi.

Svava segir að þetta hafi verið „erfitt“ en „það rétta að gera.“ Hún segir frá þessu í viðtali við The Sun.

„Þetta var mjög erfitt, þú ert bara alltaf með samviskubit,“ segir Svava. „Þú veist að þú ert að gera þetta af réttum ástæðum þannig þú verður að reyna að sleppa taki af samviskubitinu, en þér líður þannig alltaf.“

Svava ætlaði að klára skólann á þremur árum og fara aftur til Íslands. „En ég áttaði mig á að ég vildi gera meira. Tíminn líður svo hratt,“ segir Svava.

Til að byrja með var lífið mjög erfitt í Bretlandi og átti Svava erfitt með að ná endum saman. En nú þjálfar hún stjörnurnar eins og Britain‘s Got Talent dómarann Amöndu Holden og söngkonuna Nicole Scherzinger. Hún er að gefa út sína fyrstu bók The Viking Method. Hún segist ekki hafa neina eftirsjá að hafa elt drauminn.

„Á vissan hátt er ég ánægð að ég fór í gegnum allt þetta erfiða,“ segir Svava.

Raven var níu ára þegar hún flutti til móður sinnar í Bretlandi.

„Hún var í lagi samt. Þegar hún flutti hingað þegar hún var níu ára fór ég með hana til sálfræðings til að sjá hvort hún ætti erfitt með að fólk yfirgæfi hana, en mér var sagt að ég hefði ekki getað gert neitt betur,“ segir Svava.

Svava er með sautján þúsund fylgjendur á Instagram. Fylgstu með henni hér.