Jafnréttisvika fór fram í Menntaskólanum í Kópavogi í þessari viku. Á meðal viðburða var fjáröflun fyrir Stígamót í tilefni af átaki samtakanna Sjúk ást og á fimmtudag var boðið upp á fyrirlestur og uppistand í hádeginu þar sem fulltrúa Stígamóta var jafnframt afhent það framlag sem safnaðist.
„Okkur langaði að gera eitthvað öðruvísi sem ekkert nemendafélag hafði gert áður og fannst vel við hæfi að styrkja Stígamót þar sem átakið þeirra, Sjúk ást, hentar vel við þema vikunnar,“ segir Hrafn Ágúst Björnsson, formaður nemendafélags Menntaskólans í Kópavogi, en Jafnréttisvikan var nú haldin í tólfta sinn.
Skólinn fagnaði því einnig að MK er fyrsti menntaskólinn sem hlýtur jafnlaunavottun. Fulltrúi Stígamóta, Steinunn Gyðu- og Guðjónsdóttir, hélt fyrirlestur um átakið og Hugleikur Dagsson hélt uppistand. Vel var mætt á fyrirlesturinn og salurinn þétt setinn.
Jafnframt afhentu Hrafn Ágúst, Bjarki Freyr Guðmundsson og Eygló Björk Birgisdóttir, fyrir hönd MK, Stígamótum þá fjármuni sem safnast hafa í vikunni, 150 þúsund krónur. Fjáröflunin var skipulögð af nemendafélagi MK og kennaranefndinni.
„Við mælum eindregið með að aðrir fylgi okkur eftir og styrki Stígamót svo samtökin geti haldið sínu frábæra starfi gangandi,“ segir Hrafn Ágúst.
Þeir sem vilja leggja átakinu lið geta lagt inn á reikning 0101-15-630999, kennitala 620190-1449.
