Hefur líklega sjaldan verið í betra formi
Bandaríski gamanleikarinn Jonah Hill virðist hafa tekið sig hressilega á í mataræðinu því kappinn hefur líklega sjaldan verið í betra formi en einmitt nú.
Þessi 33 ára leikari, sem sló í gegn í myndum á borð við Superbad og 21 Jump Street, hefur átt í erfiðleikum með að viðhalda kjörþyngd og sveiflast upp og niður.
Mens Healt-tímaritið greinir frá því að leikarinn hafi nýlega sést í Los Angeles í æfingagallanum með hollustudrykk í hönd. Leikarinn virðist hafa verið duglegur í ræktinni upp á síðkastið auk þess virtist hann hafa bætt á sig talsverðum vöðvamassa.
Árið 2015 var greint frá því að vinir og vandamenn leikarins hefðu áhyggjur af heilsu hans og hefðu hvatt hann til að fara til einkaþjálfara.
Þess má geta að þessi bráðskemmtilegi leikari er með fjölmörg verkefni á sinni könnu þessa dagana. Meðal þeirra er myndin Don‘t Worry, He Won‘t Get Far on Foot í leikstjórn Gus Van Sant, en hann leikstýrði meðal annars myndunum Good Will Huntin og Milk með Sean Penn í aðalhlutverki. Í myndinni, sem kemur út á næsta ári, leika einnig Joaquin Phoenix, Jack Black og Rooney Mara svo dæmi séu tekin.
