Calvin Cooksey, sem er einna best þekktur fyrir að vera faðir bandaríska tónlistarmannsins Frank Ocean, hefur stefnt syni sínum og krefst hann 14,5 milljóna Bandaríkjadala frá honum, jafnvirði 1,6 milljarða íslenskra króna.

Í frétt TMZ kemur fram að ummæli sem Frank Ocean lét falla á Tumblr-síðu sinni séu kveikjan að stefnunni. Cooksey og Ocean talast ekki við og hafa raunar ekki gert lengi. Í færslu sinni á Tumblr í fyrrasumar sagði Ocean að Cooksey hafi notað niðrandi orðalag fyrir framan hann þegar hann var barn.

„Ég var sex ára þegar ég heyrði pabba minn kalla gengilbeinuna sem þjónaði okkur fagga (e. faggot),“ sagði hann í færslunni og bætti við að gengilbeinan hafi verið transkona. „Í sömu andrá dró hann mig út af staðnum og sagði að þarna myndum við ekki borða, staðurinn væri skítugur.“

Cooksey segir að ummælin sem Ocean lét falla hafi haft slæm áhrif á hann og hans atvinnutækifæri, en hann hefur reynt að koma sér á framfæri á sviði tón- og leiklistar.