Hjartaknúsarinn James Van Der Beek, sem sló í gegn í unglingaþáttunum Dawson’s Creek skömmu fyrir aldamótin, er látinn 48 ára að aldri. Hann lætur eftir sig eiginkonu og sex börn.
Eiginkona hans, Kimberly Van Der Beek, greinir frá andlátinu á Instagram.
„Okkar ástkæri James David Van Der Beek lést friðsamlega í morgun. Hann horfðist í augu við sína síðustu daga af hugrekki, trúfestu og auðmýkt. Það er ótrúlega mörgu sem á eftir að deila varðandi óskir hans, ást hans til mannkynsins og hversu heilagur tíminn er. Sá tími mun koma. Að svo stöddu biðjum við um frið til að syrgja ástkæran eiginmann, föður, son, bróður og vin.“
Leikarinn greindi frá því árið 2024 að hann hefði greinst með ristilkrabbamein. Hann sagðist þá vongóður og hafa það eftir atvikum gott. Krabbameinið uppgötvaðist í ristilspeglun í ágúst árið 2023. Leikarinn sagðist ekki hafa talið sig veikan þegar hann fór í speglunina en eftir að hann greindist áttaði hann sig á því að hann hafði fundið fyrir einkennum meinsins, helst breytingum á hægðum.
„Ég hugsaði með mér að ég þyrfti að taka til í mataræðinu, kannski hætta að drekka kaffi, kannski að sleppa því að setja mjólk í kaffið. Svo tók ég þetta út úr mataræðinu en ekkert breyttist og þá áttaði ég mig á því að ég þyrfti að láta skoða þetta.“
Hann sagðist staðráðinn í því að sigra meinið og sá fyrir sér að þetta yrði lærdómsferðalag.
„Ég hef svo mikið að lifa fyrir og þetta er svo fallegt líf.“
Sjá einnig: James Van Der Beek greindur með ristilkrabbamein
Leikarinn fæddist í Connecticut árið 1977 og lék sitt fyrsta hlutverk sem unglingur í skólasýningu á leikritinu Grease. Það voru þó unglingaþættirnir Dawson’s Creek sem áttu eftir að breyta lífi hans til frambúðar en þar fór hann með aðalhlutverkið.
