Dr. Teresa Irwin heitir læknirinn og í myndbandi á TikTok, þar sem hún er með yfir 90 þúsund fylgjendur, fór hún yfir málið. Varar hún við því að þessi ávani geti leitt til þvagleka og í sumum tilfellum valdið nýrnaskemmdum.
Í frétt Mail Online kemur fram að samkvæmt könnunum viðurkenni á bilinu 60-80% fólks að kasta af sér vatni í sturtu. Hún segir að ávaninn kenni heilanum að tengja hljóð rennandi vatns við þörfina á að pissa.
„Þetta er svolítið eins og þjálfun Pavlovs með hundana – þar sem þeir byrjuðu að slefa um leið og þeir heyrðu í bjöllu,“ sagði hún í myndbandinu. „Þannig að í hvert skipti sem þú þværð þér um hendur, ferð í sturtu eða vaskar upp, ef það er rennandi vatn, þá mun þvagblaðran þín „slefa“ af því að hún vill pissa.“
Í myndbandi Irwin segir hún að til lengri tíma litið geti þetta truflað eðlilega starfsemi þvagblöðrunnar og valdið tíðum og bráðum þvaglátum. Þetta er þó ekki það eina.
Í umfjöllun Mail Online, sem fjallar um myndband Irwin, kemur fram að sumir sérfræðingar hafi varað konur við þessu því þær geti átt það á hættu að fá þvagfærasýkingu eða jafnvel nýrnabilun.
Þannig hefur verið bent á að karlar hafi blöðruhálskirtil sem styður við þvagblöðruna þegar þeir pissa standandi, en konur hafi ekki þann stuðning.
Konur sem pissi standandi setji þannig grindarbotnsvöðvana undir aukið álag sem getur leitt til þess að þvagblaðran tæmist ekki alveg. Þá getur myndast það sem kallast þvagteppa sem getur valdið margvíslegum heilsufarsvandamálum.
Í hópi þeirra sem hafa varað konur við því að pissa standandi er Dr. Alicia Jeffrey-Thomash, sjúkraþjálfari í Boston, sem sérhæfir sig í grindarbotnsheilbrigði. Hún segir að konur séu hreinlega ekki hannaðar til að pissa standandi.
„Grindarbotnsvöðvarnir slaka ekki almennilega á, sem þýðir að við tæmum þvagblöðruna ekki nægilega vel,“ segir hún.
