Söngleikjadeild Söngskóla Sigurðar Demetz frumsýnir í ár hinn stórskemmtilega og sívinsæla söngleik Shrek á nýja sviði Borgarleikhússins. Hér er á ferðinni skemmtun fyrir alla aldurshópa með grípandi lögum, sprellfjörugu gríni og kraftmiklum dönsum.
Fyrir þá sem þekkja teiknimyndina er hér á ferðinni stórskemmtilegur Broadway-söngleikur með óteljandi hressum og fallegum lögum með Shrek, Asna, Fíónu prinsessu, vonda kallinum Farquaad og öllum hinum undraverunum; grín og gaman fyrir alla fjölskylduna.
,,Þetta er mjög skemmtileg uppfærsla á þessum fræga söngleik. Það má segja að þetta sé alger gleðisprengja og mikið ævintýri. Hér er á ferðinni frábær hópur ungra og hæfileikaríkra söngleikjastjarna sem stígur þarna á svið og þau eiga sannarlega framtíðina fyrir sér. Það er mjög gefandi að fá að vinna með svona frábæru, ungu fólki. Þau standa sig öll gríðarlega vel og við hlökkum til frumsýningarinnar þann 1. maí á nýja sviði Borgarleikhússins. Sýningin er stíluð inn á alla aldurshópa,“ segir Þór Breiðfjörð, stjórnandi söngleikjadeildar Söngskóla Sigurðar Demetz.
Að sögn Þórs er Söngleikjadeild Söngskóla Sigurðar Demetz sú elsta sinnar tegundar á Íslandi og hefur í rúman áratug komið á fót öflugri menntun fyrir upprennandi söngleikjastjörnur. ,,Nemendur hafa komist inn í virtustu háskóla í leiklist og söngleikjum bæði hér heima og erlendis, þar á meðal í leiklistardeild, sviðshöfundadeild og skapandi miðlunardeild LHÍ. Skólinn hefur mikla ástríðu fyrir því að styrkja stöðu söngleikjalistar á Íslandi með alhliða sviðsþjálfun og metnaðarfullri söngkennslu.“
Þór segir að Söngskóli Sigurðar Demetz byggi á arfleifð Scala-söngvarans Sigga Demm (Vincenso Maria Demetz) frá suður-Týról, sem kom til Íslands og hafði djúpstæð áhrif á sönglíf og söngkennslu þjóðarinnar. ,,Óperusöngvarar landsins hafa margir hlotið menntun úr skólanum, og nú heldur skólinn áfram að útskrifa hæfileikaríka listamenn í söngleikja- og tónlistarleikhúsi,“ segir hann ennfremur.
