„Ég var hikandi við að deila þessu en þetta er raunveruleiki kvenna sem ferðast einar,“ segir kona ein frá Nýja-Sjálandi, Molly, sem birti óhugnanlegt myndband í vikunni af atviki sem hún lenti í þegar hún var ein á ferðalagi um Sri Lanka.

Molly heldur úti vinsælli síðu á Instagram, molsgonewild, sem snýr að ferðalögum hennar um allan heim.

Í myndbandinu sem hún birti sést þegar maður, sem virðist sárasaklaus, vindur sér upp að henni og spyr hana hreint út hvort hún vilji stunda með honum kynlíf. Þegar Molly svarar því neitandi tekur hann getnaðarlim sinn út og sveiflar honum fyrir framan hana.

Maðurinn virðist ekki hafa áttað sig á því að Molly var með upptöku í gangi og var hún fljót að forða sér í burtu. „Maður heldur alltaf að maður sé við öllu búin en mér var brugðið eftir þetta,“ segir hún í frétt News.com.au.

Í samtali við miðilinn segir Molly að maðurinn hafi virst kurteis og eðlilegur – rétt eins og nær allir íbúar Sri Lanka sem hún hefur hitt – og hún hafi alls ekki búist við þessu. Bendir hún á að hún hafi orðið fyrir kynferðislegri áreitni víðar á ferðalögum sínum, líka í heimalandinu Nýja-Sjálandi.

Sjálf segist Molly vera sérstaklega vör um sig þegar hún er ein á ferðalögum. „Ég er alltaf með vasahníf á mér og mjög meðvituð um umhverfi mitt, en því miður er þetta veruleiki margra kvenna sem ferðast einar. Ég er alltaf með varann á mér í samskiptum við karlmenn. Jafnvel þó að langflestir þeirra séu mjög almennilegir er maður alltaf með það á bak við eyrað hvort þeir vilji eitthvað annað frá mér.“

Í frétt News.com.au kemur fram að maðurinn hafi verið handtekinn eftir að myndbandið fór í dreifingu.

 

View this post on Instagram

 

A post shared by Mols | Solo Adventure Travel (@molsgonewild)