Grill- og tónlistarhátíðin Kótelettan nær hámarki í dag, laugardag, í stilltu og mildu veðri á Selfossi. Veðurspáin gerir ráð fyrir 16 stiga hita og Sigtúnsgarðurinn er tilbúinn fyrir sumarveisluna sem framundan er. Á dagskránni eru tívolí, markaður, kynningar, BBQ festival og Stóra grillsýningin. Þá verður einnig dagskrá á Sigtúnssviðinu þar sem VÆB, Lára og Ljónsi, Klara Einars, Hubba Bubba, Íþróttaálfurinn, Ívar og Hákon, BMX Bros, Gústi B og fleiri koma fram. Dagskráin hefst klukkan 13:00 og stendur til 16:00. Aðgangur er ókeypis alla helgina.
Mummi Lú myndaði stemninguna á föstudagskvöld.
Á sama tíma fer fram árleg kótelettusala til styrktar Styrktarfélagi krabbameinssjúkra barna (SKB). Verkefnið er unnið í samstarfi við Kjarnafæði, Stjörnugrís, Ali, SS, Kjötbankann, Mömmumat, Char Broil og Olís. Heiðursgrillarar í ár verða meðal annars Hanna Katrín Friðriksson, matvælaráðherra. Kótelettusalan til styrktar SKB er orðinn órjúfanlegur hluti hátíðarinnar og hefur verið það um margra ára skeið.
Tónleikarnir í gærkvöldi tókust afar vel og spilað var langt fram undir morgun. Þar komu fram meðal annarra Bríet, Bandmenn, Stefán Hilmarsson, Helgi Björnsson, Hr. Hnetusmjör, Birnir, St. Pete, XXX Rottweiler, Hubba Bubba, Klara Einars, Háski og Izzi. Í kvöld heldur tónlistarveislan áfram við Hvíta húsið þar sem Friðrik Dór, Daníel Ágúst, Patr!k, Páll Óskar, Stuðlabandið, Nussun x Hugo, Gústi B, Tónhylur Akademía og sjálfur Björgvin Halldórsson stíga á svið ásamt nokkrum vel völdum leynigestum.
Skipuleggjendur vilja koma á framfæri innilegu þakklæti til allra gesta hátíðarinnar í gærkvöldi, sem skemmtu sér konunglega í blíðskaparveðri. Að sama skapi eru viðbragðsaðilum og öllu starfsfólki færðar sérstakar þakkir fyrir frábært kvöld.
„Þetta er fimmtán ára afmæli og vélin sem þessi hátíð er gengur alltaf betur og betur með hverju árinu,“ segir Einar Björnsson, stofnandi og skipuleggjandi hátíðarinnar. „Þetta gerist ekki af sjálfu sér og við fjölskyldan erum öllum afar þakklát. Í dag og í kvöld er fram undan glæsileg dagskrá sem ég vona að sem flestir nái að taka þátt í með okkur.“
