Leikararnir Jennifer Aniston og Pedro Pascal settu netið og aðdáendur á hliðina eftir að myndir birtust af þeim eiga kvöldverð saman í Hollywood um helgina.

Veltu margir fyrir sér hvort þarna væri nýjasta stjörnuparið komið fram í sviðsljósið en nú hefur sannleikurinn um samband þeirra verið opinberaður.

„Jennifer og ég erum mjög góðir vinir,“ segir Pascal við Entertainment Tonight á mánudag. „Og ég fór út að borða með henni á laugardag og það var skemmtilegur martini kvöldverður.“

Um helgina fóru þau út að borða saman ásamt fleiri vinum á Sunset Tower hótelinu og sást til þeirra yfirgefa staðinn saman eftir þriggja klukkustunda máltíð. Á myndum má sjá þau fyrir utan hótelið bíða eftir að bílar þeirra séu sóttir.

Pascal segir fjaðrafokið tilkomið vegna stjörnustatus Aniston, frekar en hans. „Þetta er sviðsljósið hennar, ég sóla mig bara í því.“ 

Aniston var áður í sjö ára sambandi með Brad Pitt og voru þau gift árin 2000-2005 og í átta ára sambandi með Justin Theroux sem hún var gift árin 2015-2018. Pascal heldur einkalífi sínu að mestu leyti utan fjölmiðla, en hann hefur áður verið sagður í samböndum við leikkonurnar Maria Dizzia, Lena Headey og Robin Tunney.