Brinkley, sem varð sjötug fyrir rúmum mánuði, segir á Instagram-síðu sinni að hún hafi farið með dóttur sinni til húðlæknis fyrir skemmstu og spurt lækninn hennar út í lítinn blett á andliti sínu. Læknirinn hafi skoðað blettinn, tekið sýni og þá hafi komið í ljós að um illkynja mein var að ræða.
Grunnfrumukrabbamein er algengasta tegund húðkrabbameins og ef það uppgötvast snemma eru batahorfur góðar. Brinkley, sem var andlit snyrtivöruframleiðandans Cover Girl í aldarfjórðung, sendi fylgjendum sínum ákveðna viðvörun eftir að hafa sagt frá meininu.
„Góðu fréttirnar fyrir ykkur eru þær að það er hægt að koma í veg fyrir þessa tegund krabbameins með því að nota sólarvörn.“ Segist hún ekki hafa tekið notkun sólarvarna alvarlega lengi vel en það sé liðin tíð. Nú muni hún ekki fara í sólina án þess að vera með sólarvörn númer 30, að lágmarki, og í síðerma bol og með hatt á höfði.
Loks segir hún mikilvægt að fara í reglulegt tékk hjá húðlækni til að athuga hvort meinið hafi mögulega tekið sig upp annars staðar.