Margrét Bjarnadóttir, kokkur og bæjarfulltrúi Sjálfstæðisflokksins í Garðabæ, og Ísak Ernir Kristinsson, körfuboltadómari og viðskiptafræðingur, skírðu dóttur sína um helgina.

Stúlkan fékk nafnið Erla Margrét. Fyrir eiga þau drenginn Bjarna Þór sem varð fjögurra ára í apríl.

Skírnartertan var einstök, algjört listaverk. Tertan var í laginu eins og glæsilegur svanur. Fjaðrir prýddu hliðarnar og ofan á var langur háls og á höfðinu var gulllituð kóróna.

DV hafði samband við Margréti til að forvitnast um tertuna, hvort hún hafi verið keypt eða hvort afinn hafi lagt sig allan fram við verkið. En faðir Margrétar er Bjarni Benediktsson, forsætisráðherra Íslands. Baksturshæfileikar hans eru þekktir en hann hefur bakað hverja glæsitertuna á fætur annarri. En í þetta sinn fékk afinn að njóta bara á meðan fagmenn sáu um verkið.

Margrét segir að hún hafi verið búin að finna mynd á netinu og fengið Sætar syndir til að gera kökuna.

Fókus óskar fjölskyldunni innilega til hamingju með stúlkuna.